نشرت صفحة الشابة ميشيل الحجل على فايسبوك التي توفيت منذ حوالي ٤ سنوات بعد صراع طويل مع مرض السرطان، صوراً من امام قبرها لافتةً النظر إلى أمور غريبة وغير مالوفة تحصل بجثتها، وكُتب في المنشور:
“اليوم انسمح لإلي احكي و خبر انو رح يكون عنا قديسة جديدة من لبنان. من بعد اثباتات علمية و إشارات صرلها سنين لليوم عم تحصل بسبب ميشيل، و كرمال ما نُتًهَم بالتخيلات متل من البعض، و للاسف خجلوا من نفسن، و من بعد ما اتوافق انو نفتح مدفن ميشيل، مبارح و بوجود كاهنين من رعيتي، و شخص من عائلتي اللي هوي أسعد، و العم جوزيف المسؤول عن المدافن يللي ركع و صار يبكي، اتبين انو وجها لميشيل من بعد اربع سنين بعدو نفسو بتفاصيلو، ملمسو طري، شعرها طولان لدرجة مغطا نص وجا، حواجبها ظاهرين كتير و مع العلم انو ميشيل اندفنت بلا شعر و بلا حواجب. و هالشي الطب أكد انو قدرة الهية موجودة مع ميشيل، لان من بعد اول سنة الجسم بيتحلل كلو، و من ٢٤ ل ٤٨ ساعة الشعر و الاظافر بيوقعو، و بالأخص انو ميشيل آخدة كيماوي اللي بيخلي الجسم كلو يتحلل قبل غيرو حسب ما قال الحكيم.
حوالي النعش و بقلبو بتفح ريحة القداسة، و النقاوة و النضافة ظاهرة. رح ننطر الكاهن يرفع الشهادة لسيادة المطران تا يجي مع اللجنة و يشهدوا، و ينقلوا ميشيل لمحل بيليق فيها و بقداستها.
الكاهن قلي: “القديسين كلن بيتقدسوا بعمل بشري و عمل الهي، ميشيل اثبتت انها تقدست بالعمل البشري، الناس آمنوا فيها و حبوها لليوم، و العمل الالهي شفناه بعيوننا اليوم.”
ميشيل انا كنت عارفة.. و كتار غرباء كنتِ تبعتين تا يخبروني، و وعدتك ما سكر باب الرب.
شو قوية انت يا ميتشي.. شو قوية بإيمانك و بحبك ليسوع تا قدرتي تخلي الناس تحبك و تآمن فيكي تا وصلتينا نشهد عا أجمل ما شافت العين.. شو كبيرة رحمتك يا يسوع.. هللويا هللويا..
الكاهن قلي: “افرحي و تهللي” بس يا ميتشي شو صعب هالاحساس، و شو ملخبط! مش عارفه ببكي او بفرح! دخيل وجك انا!
ميشيل، خادمة الرب..
ميشيل، عا درب القداسة عن قريب..
